لو عايز تذاكر ومالكش نفس تعمل ايه ؟؟؟

كتير مننا بيبقى عنده مذاكرة كتيرة جدا ومش قادر يخلصها وكمان مش عارف يركز في أي حاجة خالص

بل بتوصل بينا الدرجة اننا بنكره بعض المواد وبنبقى مش طايقين نذاكرها

حاسين بحاجز نفسي رهيب بينا وبين المواد اللي هنذاكرها

عندنا دروس أو محاضرات كتيرة جدا مش لاحقين نلمها

ياربي طيب ايه العمل بنذاكر وبننسى كل اللي بنذاكره

وكل ما نفكر في ان في امتحان بنتوتر ونقلق اكتر.

ولما بنشوف ورقة الامتحان بنحس ان احنا نسينا كل كلمة ذاكرناها

حاسين بضياع الهدف ومحتاجين نتشحن طاقة إيجابية

كدا يبقى كلنا لازم نشوف الفيديو ده

المشكلة بتتلخص ان لو أي حد متعود على حاجة وبعدين جه مرة واحدة يغيرها بيحصل عنده حاجة من اتنين

الأولى اسمها (Resistance Zone)  أو دايرة المقاومة او منطقة المقاومة

والتانية اسمها (Comfort Zone) منطقة الراحة والانتخة

طيب الكلام ده معناه ايه ؟

نوضح بمثال :

لو واحد متعود انه ياكل كتير وياكل كل حاجة بيحبها

وفجأة قلنا له اعمل ريجيم

هتلاقي عنده مقاومة للريجيم ومش عايز يطبقه بل بالعكس ممكن نلاقيه بقى بياكل اكتر وبشراهة

لانه هيحس وقتها بضيق شديد وانه محروم من حاجة هو بيحبها .طيب الشخص ده علميا لو قدر يلتزم بالريجيم ده لمدة أسبوع هيبدأ جسمه يتحول للمنطقة التانية وهي منطقة الراحة والتعود.يعني هيبدأ يحس بنوع من الارتياح للحاجة اللي مكانش طايقها وهي الريجيم.بل ده كمان هيحبه ويستمتع بيه وبالنظام الصحي الجديد ويتحول مع الوقت لاسلوب حياة بالنسباله. مش كدا وبس لا ده كمان لو لخبط في الاكل بعدها بفترة هيحس ساعتها بالضيق وعدم الارتياح .

ده بالظبط اللي بيحصل معانا كلنا لم نكون متعودين على اللعب فترة وفجأة نضطر نبدأ مذاكرة ونمسك كتاب ونذاكر

هنحس بضيق رهيب وعدم ارتياح وقلة تركيز . لو قدرنا نتغلب على الإحساس ده ونقاومه ونكمل هنلاقي نفسنا بعد أيام بسيطة هيختفي من عندنا الإحساس ده وهتختفي معاه كل الاعراض اللي كنت حاسس بيها لما فكرت تبدأ مذاكرة

طيب انا عندي حاجز نفسي مع الكتاب وبكره المذاكرة ومش عايز اذاكر

تعرفوا ان عقلنا الباطن ده خادم امين جدا ومطيع لينا

يعني طول ما احنا بنكرر قدامه احنا بنكره المذاكرة احنا بنكره المذاكرة احنا بنكره الكتاب ومش طايقينه عقلنا الباطن بيسمع كل كلامنا ده وبيصدقه ويسجله عنده وهيعتبر ان ده امر مننا ليه ولازم ينفذه فيقوم مبرمج كل جسمنا لتنفيذ الامر ده.

اللي هو سيب الكتاب .... متذاكرش

اقعد على الفيس بوك ... العب جيمز اتفرج على التليفزيون

ويبدأ يخلينا نهرب من كل حاجة تخص المذاكرة والكتاب بل ونتضايق لما نسمع كلمة ذاكر. مش كدا وبس ده ممكن يخليك تحس باعراض نفسية زي الصداع او المغص اول ما تمسك الكتاب- انتم متخيلين ؟؟؟

طيب نعمل ايه ؟ وايه الحل ؟؟؟

علشان نحل المشكلة دي لازم نلتزم بالحاجات دي :-

1-                أول حاجة لازم نوقف التفكير في أي حاجة سلبية زي او الكلمات السلبية اللي كنا بنرددها زي اني مش هقدر اذاكر او مش مستوعب او المنهج صعب وما إلى ذلك من التعبيرات المحبطة.

2-              فكر في كل حاجة إيجابية ممكن تحفزك زي انك تكلم نفسك وتقول انا بحب المذاكرة أنا هنجح وبتقدير ان شاء الله.

3-              صدق كل الكلام الإيجابي اللي انت قولته على نفسك لا وعيشه كمان كما لو كنت فيه وتقمص شخصية الطالب المتفوق والمجتهد اللي بيذاكر دروسه أول بأول.

4-               تخيل نفسك في المكان اللي انت بتحلم بيه يعني لو انت نفسك تبقى مهندس تخيل انك مهندس وانك بتشتغل في شركة معينه انت نفسك فيها من دلوقتي

لو انت تحلم انك تبقى دكتور تخيل انك بقيت دكتور وشغال في عيادتك الخاصة او في مستشفى انت بتحلم تشتغل فيها.

5-              عيش الحلم ده فعليا بناءا على قانون اسمه الجذب كدا هتنجذب اليك الوسائل اللي تمكنك من تحقيق الحلم ده وهتستغرب من ده .

عندي حاجز نفسي بيني وبين الكتاب ومش عارف أذاكر مش عارف ادخل في موود المذاكرة أعمل ايه ؟؟؟

بص الحل السحري للمشكلة دي هي

"إنما العلم بالتعلم "

يعني ايه الكلام ده؟؟؟؟

بص يا سيدي اول ما تمسك الكتاب وتلاقي نفسك ملكش نفس تذاكر قول لنفسك خلاص خلاص متزعليش احنا هناخد بريك مثلا لمدة نص ساعة أو ساعة مش هتذاكر فيها أي حاجة كل اللي هتعمله انك بس تمسك ورقة وقلم وهتقعد تعمل شخابيط ايه شخابيط ؟؟؟؟ اه شخابيط وبس

يعني هنشخبط الدرس ونعمله على هيئة رسومات بدون أي تركيز يعني مجرد نقل اعمى لاي درس او رسمة عندك في الكتاب هتلاقي نفسك ابتديت تدخل في الموود بتاع المذاكرة بعد دقايق من التجربة دي وهتنبهر إنك ممكن كمان تلاقي نفسك حفظت حاجة من اللي كنت بتشخبطه او بترسمه بدون ما تحس.

كدا انت طبقت "انما العلم بالتعلم"

يعني افتعلت التعلم ومثلت انك بتتعلم واتعودت عليه ومارسته فا اتعلمت بدون ما تحس وعلى فكرة الطريقة دي هتفيدك في حياتك كلها يعني مثلا لو جربتها  في حفظ كلمات انجليزية مثلا هتقوم جايب ورقة وقلم واقعد شخبط وارسم شكل الكلمات بدون تركيز وبعد شوية وقت هتلاقي نفسك حفظت شكل معظم الكلمات اللي كنت بتتسلى وتشخبطها حفظتها وبقت في ذاكرتك.

ممكن تجربها برضه لو انت شخص عصبي وتتعصب بسرعة اول ما يحصل موقف يعصبك مثل دور الشخص الهادي ومع الوقت وباتباعك للطريقة دي هتلاقي المواقف اللي كانت بتعصبك بقت بالنسبالك مواقف عادية ومش مستاهلة تنرفزك

وتقدر تطبق الطريقة دي على أي حاجة عايز تتعلمها مثل انك بتتعلمها هتلاقي نفسك اتعلمتها بالممارسة بعد 7 او 14 او 21 يوم تقدر تغير أي عادة عندك

طيب انا بذاكر وبنسى اعمل ايه؟؟؟

الحل لموضوع النسيان لاي حد حتى لو متفوق هو التكرار ثم التكرار ثم التكرار.

كل الطلبة المتفوقين اجمعوا انهم الى جانب ان عندهم التزام ذاتي في المذاكرة وتعويد نفسهم انهم يصبروا على الكتاب ويذاكروه انهم يلجأوا الى تكرار الدروس أو بعض أجزاء من المنهج علشان يتمكنوا من الجزء ده ويتقنوه بشكل صحيح وبالتالي يحصلوا على اعلى الدرجات.

فا اوعى توهم نفسك وتقول انا بس اللي بنسى ودي مشكلتي لوحدي لا دي مشكلة عامة عند معظمنا بس دي حاجة ليها حل وحل واحد وهو التكرار ثم التكرار ثم التكرار.