يعني ايه جرامر ؟؟؟؟

                                                                 

علم النحو أو علم القواعد عموما(الجرامر) مجال دراسة قديم جدا معروف منذ القدم

 

لو احنا لاحظنا ان الجملة في البداية انقسمت الى فاعل وفعل فقط وده تم عن طريق فيلسوف يوناني قديم مشهور كان اسمه (بلاتو) والكلام ده كان من حوالي 2400 سنة فاتت 

 

وبالتالي الطلبة على مستوى العالم لقوا ان الكلام ده يستدعينا اننا ندرس التركيب الخاص بالكلمات والجمل يعني نعرف هي مقسمة ازاي وأقسامها ايه بالضبط

 

طيب ليه الكلام ده؟؟؟

     لأن المهارة الخاصة بالتحدث والكتابة كانت سمة مميزة لأي حد educated يعني أي حد متعلم أو مثقف يعني طبيعي نلاقي أي حد متعلم ومثقف يتكلم كويس ويكتب كويس

والطبيعي انه يكون دارس جرامر اللي هو علم القواعد الخاص باللغة نفسها.

 

درس بدرس ان شاء الله هنحاول نشرح لكم الحاجات الأساسية في تقسيم الكلام في اللغة الإنجليزية وهنعرف انه الكلام في اللغة الإنجليزية اتقسم لثمانية أجزاء.

في شوية تفاصيل في بعض الأجزاء منهم وفي أجزاء تانية الكلام والشرح هيبقى سهل ومفيهوش أي تعقيد او تفاصيل كتيرة بإذن الله تعالى.

    

لو بصينا على الشكل اللي في اول المقالة هنلاقيه بيوضح الثمانية أجزاء اللي احنا هنتكلم عنهم بالتفصيل في الحلقات الجاية ان شاء الله.

 

التكوين الأساسي لأجزاء الكلام في اللغة الإنجليزية هي (الأسماء – الضمائر – الأفعال – الصفات – الحال – حروف الجر – أدوات الربط – التعجب)

 

What is Grammar

ما هو الجرامر؟ أو يعني ايه جرامر أو يعني ايه قواعد اللغة؟

Here’s an old children’s rhyme about the eight parts of

speech of English grammar.

ببساطة الأجانب عملوا اغنية للأطفال عن الثمانية أجزاء الخاصة بالجرامر في اللغة الإنجليزية علشان يسهلوا عليهم فهمهم وحفظهم للأجزاء دي وعلشان كمان مايملوش أو يزهقوا منها.

وهي سوف تعطيك فكرة عما هو الجرامر من الأساس؟

1-      الاسم – noun

Every name is called a noun,

As field and fountain, street and town.

كل اسم في اللغة الإنجليزية يسمى noun   مثل الحقل والنافورة والشارع والمدينة دي كلها أسماء

 

2-    الضمير – pronoun

In place of noun the pronoun stands,

اللي يحل محل الاسم هو الضمير مثل هو وهي

 

3-    الصفة - adjective

The adjective describes a thing,

As magic wand or bridal ring.

الصفة هنا بتوصف شيء معين زي عصا الساحر وخاتم الزواج

 

4-     الأفعال – verbs

Most verbs mean action, something done,

 

معظم الأفعال تعني حركة او فعل معين زي يقرأ ويكتب ويقفز ويجري

 

5-    الظروف أو الحال – adverbs

How things are done the adverbs tell,

As quickly, slowly, badly, well.

الأشياء بتتعمل ازاي الظرف أو الحال هو اللي بيقولنا بتتعمل ازاي مثل بسرعة وببطئ وبسوء وبطريقة جيدة

 

6-    حرف الجر – preposition

The preposition shows relation,

حروف الجر هنا بتورينا علاقة زي في الشارع وعند المحطة طبعا هو بيجيب في الأغنية مجرد أمثلة مش شرط يجيب كل الأسماء او كل الأفعال أو كل الظروف أو كل الضمائر أو كل حروف الجر هو بس بيذكر مجرد أمثلة علشان الفهم.

 

7-    الروابط – conjunctions

Conjunctions join, in many ways,

Sentences, words, or phrase and phrase.

العطف أو الروابط هو مثلا زي اللي عندنا في اللغة العربية مثل حرف الواو وده بيربط في معظم الأحيان جملة بجملة أو كلمة بكلمة أو تعبير مع تعبير.

 

8-    التعجب – interjection

The interjection cries out, “Heed!

An exclamation point must follow me!”

هنا بيقولك التعب صرخ وقال خدوا بالكم علامة التعجب بتيجي بعدي عالطول وعلامة التعجب هي الشرطة اللي واقفة وتحتها نقطة.

 

طبعا كل جزء من الأجزاء اللي ذكرناها فوق في الحلقة دي هنشرحه بالتفصيل الممل ان شاء الله في كل حلقة هنشرح جزء واحد وطبعا هندعم ده بالكتير من الأمثلة اللي تساعدنا على استيعاب الشرح ويسهل علينا عملية التعلم والاستذكار بإذن الله تعالى.

 

كما سنقوم باستكمال شرح القواعد الخاصة باللغة الإنجليزية وكذلك الأزمنة بطريقة سهلة وسلسلة تسهل على الدارس استيعاب القواعد وتمكينه منها خصوصا طلاب المدارس وخاصة الإعدادية والثانوية.

 

طب ممكن نقول حاجة مهم جدا جدا جدا هنا

وهي ان الإنجليزي مش قواعد بس يعني مش جرامر بس إنك تتعلم انجليزي وتدرسه كويس جدا جدا وتبقي طليق فيه انت مش محتاج بس تدرس قواعد لغوية بس زي النحو عندنا في اللغة العربية انت كمان محتاج الاتي:

1-      حفظ كلمات انجليزية وتبقى عارف معناها بالعربي علشان تقدر توظف الكلمة في مكانها المناسب في الجملة.

2-    تعرف مترادفات الكلمات طيب واحد يقولي يعني ايه مترادفات أقوله شوفت الكلمات اللي انت حفظتها في النقطة رقم 1 اللي فوق دي انت محتاج تعرف معاني الكلمات دي وتوجد كلمات تانية تساوي نفس معنى الكلمات دي

يعني مثلا لو قولت لك كلمة زي calm اللي هي معناها هادي كد ا انا حفظت الكلمة بمعناها طيب لو قولت لك هاتلي مرادف ليها بالإنجليزية هتقولي quiet ودي معناها برضه هادي يعني كلمتين ليهم نفس المعنى ولو استخدمتهم في جمل هيأدوا نفس المعنى بالضبط علشان كدا سميتهم مترادفات.

3-    ثالث حاجة عزيزي إنك تعرف التضاد واحد هيقولي يعني ايه تضاد هقوله زي اللغة العربية انت مش كنت بتاخد دروس عربي وفي اخر الدرس بيجيبلك الكلمة ومعناها أو مرادفها وبعدين يجيبلك الكلمة ومضادها أهو هو ده التضاد عزيزي

طيب انا مش فاهم ممكن توضح لي بزيادي شوية اوك يا فندم بص تاني على المثال اللي فوق ده اللي هو كلمة calm

 

أظن كدا التلات نقاط اللي فوق دول تم شرحهم ببساطة في المثال السابق إنك في الأول بتحفظ الكلمة بمعناها بالعربي وبتعرف مرادفها يعني كلمة تانية باللغة الإنجليزية تؤدي نفس معنى الكلمة ومضاها أي كلمة عكسها تماما في المعنى وكل ده طبعا بنحط في جمل علشان معنى الكلمة يثبت في ذهننا وحفظها يثبت معانا ونقدر بعد كدا نستخدمها في أي وقت بشكل صحيح وسليم.

 

يبقى احنا كدا في رحلتنا في تعلم الإنجليزية بنتعلم جرامر اللي هو القواعد ومعاه كلمات ومرادفها وعكسها وبعد كدا بنحفظ تعبيرات على بعض يعني ايه تعبيرات؟؟؟؟

الموضوع ببساطة هو إنك بدل ما كنت بتحفظ الكلمة بس لوحدها بقيت تحفظها ومعاها كلمة تانية او اتنين وده بنسميه تعبير طيب ممكن نشوف امثلة للتعبيرات دي؟ اه طبعا نشوف امثلة

خد يا سيدي

Have breakfast ودي معناها يتناول طعام الإفطار

يعني بدل ما احفظ كلمة have  لوحدها وكلمة breakfast  لوحدها حفظت الاتنين مع بعض وكمان عرفت معناهم علشان لوحبيت استخدم في جملة من تأليفي.

 

طيب في ايه تاني في الإنجليزي يا سيدي غير حفظ الكلمات وتعلم القواعد وحفظ التعبيرات أقولك في حاجة اسمها حروف الجر مع الأفعال دي بنسميها بالإنجليزية phrasal verbs  ودي مهمة جدا لإنها بتخلي الفعل معناها يتغير لما نضيف له حرف جر معين ايه ده بص انا مابفهمش من غير مثال اديني مثال

طيب ياسيدي عندك الفعل give  معناه يعطي حط جنبه حرف الجر up  تبقي give up

كدا أصبح معناها يستسلم شوفت بقي مش قولت لك ان الفعل لو حطيت معاه حرف جر هيديك معنى تاني 

طبعا ال phrasal verbs هيبقي ليها حلقات كتيييير هنشرح فيها الحاجات دي بالتفصيييل اوي.